1Cor 15 | MHL | STEP | Aria emar unowik, ni kiiriw nainiw kema suuweka naep nia maakiyem. Feenap, yo iiriw ni niar ikiwep Yeesus opor eliwa nia maakemkun ni opora nain miimap opaman. Opap naap ookam-ikaiman.

1 Corinthians 15

Krais umep iikirak

1 Aria emar unowik, ni kiiriw nainiw kema suuweka naep nia maakiyem. Feenap, yo iiriw ni niar ikiwep Yeesus opor eliwa nia maakemkun ni opora nain miimap opaman. Opap naap ookam-ikaiman. 2 Ne opor eliwa nia maakem nain iiwawun kekanep ookam-ikowen-na Mua Maneka eena nia aawok nain ona nia asipam-ikaeya ni wueliwa ikowen. Ne opor eliwa nain ara papako me ookowen-na ni opora opaman nain makena me arinon.

3 Moram yiena Maneka opora efa maakek nain nan nia maakomakem. Nain opor maneka feenap, Krais eena i pina muuta nain umok. Iiriw Mua Maneka naap maeya opora siisimep-puiwkin ikua, nain kakeniw naap imenarek. 4 Ne aria fain maek nain pun makena arek, umeya soopamik. Soopiwkin fofa arow-pa Mua Maneka-ke iikirowak. 5 Ne fain pun nia maakem, iikirap Pita wiar imenarek. Naap ikok ona uuwow mua ten kuisow erup nain pun wiar imenarek. 6 Ne naap ikok wi mua unowa, andet ikur naap, iiriw ookap yiawemik nain wiam fiirimep ikaiwkin wiar imenareya urufamik. Wi mua nain papako umemik, ne unowa nan ikemik. 7 Ne aria naap ikip ikok Yems wiar imenarek. Ne naap ikok ona uuwow mua teeria papako pun wiar imenarek.

8 Ne yo murarow akena epa maala ikok efar imenareya yena mokok onaiya urufam. Me efar imenarowa nain efar imenarek. Feenap saarik, aite-ke muukaremi samor efa muukarinon naemik-na wia, eliwa efa muukarek, naap saarik.

9 Wi aposel teeria-pa yo meta marew akena ikem. Moram yo iiriw Mua Maneka teeria wia samoram-ikem. Naapeya aposel me efa maekamik. 10 Nain Mua Maneka-ke efa saliweya yo kema kirep aakisa ona uuwow mua wiar arem. Ne o manek akena efa kemalep efa asipak nain oram me ikainok naep yo kerew akena uuwam-miawiyem. Wi aposel papako kerew uuwimik, nain yos-ke uuwowa kerew akena uuwiyem. Nain me yena kekanowa-pa uuwiyem, weetak, Mua Maneka-ke efa asipeya uuwam-miawiyem. 11 Neemi yo opora nia maakem nain wi aposel papako pun opora kuisow nainiw nia maakemik. Naeya ni opora nain opaman.

I Krais teeria umep iikirowa opora

12 Ne aria i Mua Maneka opora nia maakemi fain pun nia maakemik, Krais umep ikaeya Mua Maneka-ke iikirowak. Naapeya mua umimik nain wiimar iikirikuan. Nain moram ni mua papako-ke wi umimik nain me iikirikuan naiman? 13 Ni fain kema suuweka. Mua umimik nain me iikirikuan-na Krais pun Mua Maneka-ke me iikirowekak. 14 Naap-kekena i o opora nia maakem-ikemik nain makena me yiar arekak. Naeya ni Krais opora wiar opaman nain ni oram maneka wiar opakaman. 15 Ne pun wi mua umimik nain me iikirikuan-na Mua Maneka opora nia maakemik nain yia peeskimeman, naap yia naekaman. Neemi i feenap yia maekaman, “Mua Maneka Krais me iikirowak nain wis-ke maemik, iikirowak,” naap yia maekaman. 16 Naapeya feenap maiyem, Mua Maneka wi mua umimik nain me wia iikirowinon-na, Krais pun iiriw me iikirowekak. 17 Naap nain ni Krais opora wiar opaman nain makena me urufekaman. Naeya ni pina naap niar ikekak. 18 Ne wi mua iiriw Krais opora wiar opam-ikemik nain umemi epa mukuna ikiwekamik. 19 Ne i Krais opora wiar opimik nain feenap maiyen-na, “Opora fain miiwa-pa ikaimik nain yia asipiya, umemkun wia, me yia asipiya,” naap maekamik-na aa, wiisak, i iiwawun momor teeria ikekamik.

20 Aria, opor makena feenap, Krais umep ikaeya Mua Maneka-ke o kiikir iikirowak. Ne wiimar ona teeria umimik nain pun wia iikirowinon. 21 Moram iiriw mua kuisow pina oneya miiw unowa fain umowa imenarek. Naeya mua oko-ke i mua unowiya pina yiar akuawemi umok. Umep ikok iikirak. Naeya is pun wiimar iikiriyen. 22 Feenap, i miiw mua nomokow fiira Adam pina-pa umowa wuak. Naapeya i ona nembesir teeria pun umimik. Aria aakisa i Yeesus Krais teeria wiar ekamik nain umep wiimar iikiriyen. 23 Iikirowa nain ona epa onaiya ikua. Feenap, mokomokoka Mua Maneka-ke Krais iikirowak. Naap ikok wiimar Krais miiwa kiiriw oraiya nain ona teeria o ookimik nain pun wia iikirowinon. 24 Ne wiimar miiwa weeserow epa-pa Krais-ke wi owow saria ne wi anim onom mua mane-maneka kekanowa wiar weeser-wuami miimowa-pa ikok miiwa unowa urufinon. Naap ikok maa mutumut ona wiawi Mua Maneka wapena-pa wuomaya urufam-ikainon. 25 Feenap, Krais woos mua-pa ikok ona iiwua unowa iiwawun wia porop emin akena-pa wia wuinon. 26 Ne murarow akena umowa pun iiwawun weeser-wuinon. 27 Moram Mua Maneka opora-ke feenap maek,

“Mua Maneka-ke Krais miimowa-pa wuap miiw maa muutitik tepak-pa wiar wueya os-ke urufinon.”
(Someka 8.6)

Naap maek. Makena, Krais-ke ikoka maa mutumut urufinon. Mua Maneka-ke maeya maa mutumut urufiya. Naapeya Mua Maneka iinan-pa me wiar ikainon. 28 Iir nain maa unowa Krais tepak-pa wiar ikaeya Krais ona Mua Maneka tepak-pa wame wuinon. Moram Mua Maneka-ke miiw maa mutumut Krais tepak-pa wiar wuomakek. Naeya Mua Maneka waisow iinan-pa ikok wi mua ne maa iiwawun nain onamiaremi urufinon.

29 Ne aria Mua Maneka mua umiwkin wia iikirowowa nain feenap maiyem. Mua papako Yeesus opora wiar opamik. Ne me wia yasuwowa ikaiwkin umemik. Naeya wiena teeria mua papako-ke wi unuma-pa wiar iimariwkin wia yasuwimik. Aria Mua Maneka mua umimik nain wiimar me wia iikirowekak-na wi oram maneka wia yasuwekamik. Yo pepek maem-i? 30 Ne oko yiena yiam maimik, i moram uuwowa-pa yiawem-miok anane maa anima-pa arowa pun eliw maimik? 31 Ne yo moram anane sirirowa sira-sira aawemi “Yo umekam oo” naiyem? Iikirowa ikaeya yo naap maiyem. Ne nain naep ni Yeesus Krais teeria wiar ekiwkin yo yame iriyem. 32 Ne yo Efesus-pa fan ikok uuwam-ikemkun wi mua asia saarik efa samo-samoramik, nain yo yoowa aawemi naap uuwam-ikaiyem. Nain yo miiw maa muutiw kema suuwami uuwam-miawekam-na yo moram naep yoowa aawem-ikekam? Ne oko feenap, mua umimik nain Mua Maneka-ke wiimar me yia iikirowinon-na i opora wiokami feenap maekamik, “Aa, uurika umiyen-yon. Naapeya aakisa i maa oko kema suuwow marew, maa enowa muutiw ikaiyen,” naap maekamik. 33 Ni momora me niam puukoweka. Ni amisareman, wi mua momor opora aakunimik nain anane wiamiya soomarowen-na nis pun kema nain wiar aawowen. 34 Naapeya ni kema suuwap kema kireka. Ni mua papako emina kekanep Mua Maneka maa maek nain kema me wuap momor maneka ikaiman. Yo naap nia maiyem nain ni emina me ururiman-i?

Wiimar iikirowa nain mia sira onaiya ikaikuan

35 Aria mua-ko efa nokarikuan-na, “Wi mua umep ikok iikirowa maen nain wi kamenap iikirikuan?” Ne oko feenap efa nokareman, “Wia soopiwkin iiriw peelalemik nain mia sira kamenap onaiya iikirikuan?” Ni naap maiman. 36 Aa, ni mua momora saarik aakuniman. Ni maa fain kema suuweka, maa makena upiwkin kamenap arinon? Maa makena mumua upiwkin opa urupep mumua miiwa-pa wuan nain peelalinon. Kekanowa ikainon-na opa me urupinon. 37 Feenap, maa makena mumua gelemuta upon nain urufowa oko, ne ikoka opa urupiya nain urufowa sira oko. Ne maa makena sira-sira upimik nain Mua Maneka-ke maa naap tawerarep-pueya ona iiriw sira ononaiya arimiya. Naeya maa makena sira-sira ikomakiya nain opa urupep arimemi sira ononer imenariya.

39 Ne maa oko feenap, Mua Maneka miiw maa unowa taweraremi mia sira oko-oko yia wuomak. I mua mia kanima sira onaiya, ne miiw maa eneka, nepa ne mera wi onaiya. 40 Ne aapereka maa muutitik aapereka-pa ikainok naep wuomakek, ne miiw maa miiwa-pa ikainok naep wuomakek. Nain aapereka maa urufowa eliwa, nain sira onaiya, ne miiw maa pun naap, urufowa eliwa, nain sira onaiya. 41 Ne ama ne siiwa wilinowa wiena oko, ne mokoma unowa wilinowa oko. Nain mokoma aapereka-pa ikomakek nain wiena ononer wilinimik.

42 Ne aria i mua umimik nain ikoka Mua Maneka-ke yia iikirowowa nain feenap, i umemkun yia soopiwkin peelaliyen. Ne ikoka Mua Maneka yia iikirowiya nain, mia kanima oko, peelalowa marew, nain onaiya iikiriyen. 43 I mia sapuka yia soopimik nain maa eliwa marew. Ne ikoka Mua Maneka yia iikirowiya nain mia eliwa ne dubila ikaiyen. I miiwa-pa ikowa fain mia kekanowa marew. Yia iikirowiya nain mia kekanowa onaiya ikaiyen. 44 I mia yia soopimik nain miiwa-pa feek ikowa nain mia-ke. Ne yia iikirowiya nain owow iinan-pa ikowa mia-ke. Feenap, i aakisa miiwa-pa ikaimik nain mia oko. Naapeya ikoka owow iinan-pa ikowa nain mia sira oko.

45 Naapeya Mua Maneka opora pun feenap wiar siisimep-puiwkin ikua,

“Mua Maneka eena mua uuwak nain unuma Adam nain ewar iweya miiwa-pa ikua.”
(Yenesis 2.7)

Ne murarep Adam oko eena uuwak nain Krais. Os-ke ona kekanowa yieya i anane eliw ikaiyen. 46 Aria ni feenap kema suuweka. Mua Maneka mokomokoka mia yiek nain me iinan owowa-pa ikowa naep yiek, weetak. I mia fain miiwa-pa feek ikowa naep yiek. Ne ikoka iinan owowa-pa ikowa nain mia sira oko yiinon. 47 Iiriw o miiwa aawep mua nain sirarek. Ne mua oko Krais-na, owow iinan-pa ekapok. 48 Miiw mua nain kiikir sirarek nain umep miiwa arowa-ke. Naapeya i o upowiya unow onaiya mia naap ikemik. Ne mua eena owow iinan-pa ekapok nain mia sira kamenap ikua naap i eena o teeria wiar ikemik nain pun mia naap ikaiyen. 49 I miiwa-pa ikowa mia fain eena Adam miiwa-pa imenarek mia naap akena onaiya ikemik. Ne aria owow iinan-pa ikowa mia Krais ona mia naap akena ikaiyen.

50 Emar unowik, yo feenap maiyem. I miiwa-pa ikemik mia fain onaiya Mua Maneka iinan owowa-pa wiar ikowa nain me pepek. Moram i mia fain ikoka umep peelalowa-ke. Naeya i mia fainiw owowa eena mia me peelaliya neek ikowa me pepek. 51 Ni kema-ko aaweka. Opora iiriw kokot ikua nain aakisa nia maakiyem. Feenap, Krais miiwa nainiw oraiya nain i ona teeria-pa wiar ikok me umowa ikemik nain, iir nain i unowiya mia-keriw kirep enuma ariyen. 52 Nain Mua Maneka ensel-ke puuw fuuram-ikaeya aapereka wilinowa saarik feekeriw furewiyen. Iir nain Yeesus Krais teeria mua papako iiriw umemik nain mia enuma puukap iikirikuan, mia enuma eena me peelalowa nain. Naapeya i unowiya Yeesus teeria miiwa-pa ikemik fain iiwawun mia enuma aromakiyen. 53 Moram i aakisa mia fain umep peelalowa nain iir nain mia-keriw kirep enuma arep nainiw me peelaliyen. 54 I mia naap yiar arowa nain Mua Maneka opora iiriw wiar siisimep-puiwkin ikua nain feenap,

“Mua Maneka-ke nomakemi umowa iiwawun weeserowak.”
(Aisaiya 25.8)

Iir nain opora nain makena arinon. 55 Ne i palanemi opora feenap maiyen,

“Oo umowa, no eliw yia nomakinan-i? No eliw yia samorinan-i?”
(Hosea 13.14)

56 Aria i yia samorowa nain onoma fanek. Mua Maneka sira unowa yia maakek nain wiar puukimik, yiena muut nan pina-pa kokor erap ikaimik. Ne yiena pina-pa umimik. 57 Nain i aakisa Mua Maneka yia asipeya sira eliwa naakimik. Moram yiena Maneka Yeesus Krais-ke umemi yia aawok. Naeya i pina ne umowa kiiriw me yia ifemakinon. 58 Naapeya nia maakiyem, ni opora opiman nain kekanep naap ikeka. Ne yiena Maneka uuwowa wiar onami topialem-ikeka. Moram ni amisareman, ni Mua Maneka uuwomami yoowa aawiman nain ikoka makena urufowen.